Un ano máis chega ao seu fin e son bos tempos para facer un balance.
Podemos afirmar que este 2009 foi un ano cheo de traballo e de proxectos que chegaron a bon porto.
O noso traballo deu un salto cualitativo, mellorando moito a posta en escena e o ritmo de traballo.
En canto á relevancia do noso traballo comezamos o ano sendo pregoeiros do Antroido de Compostela, estreando no mesmo marco o espectáculo CABARÉNCRISE non sen antes percorrer as rúas do casco vello de Compostela a ritmo de Cabarédeambulante. A praza do Toural eteigada de xente vibrou co pregón, a coreografía e a música dixie da St James Street Band.
Un mes máis tarde, xa entrando abril, estreabamos unha nova proposta de rúa que celebrou a campaña “A Cidade que Lee” do Excmo Concello da Coruña. Caracterizados de escritores de inspiración decimonónica e acompañados pola música do acordeón, as rúas enchéronse de versos e exaltación poética co espectáculo “Ronda Poética, Batallón Literario”, que ademais das 5 funcións no Concello da Coruña chegaría a Ourense o 16 de maio para celebrar o 50 aniversario da Esmorga.
Seguimos traballando, e o verán chegou cheo de datas, como a participación no XX Festival Internacional de Teatro de Rúa de Lekeitio (Bizkaia), as festas de Elgeta (Gipuzkoa), as festas de Vigo, ou festival Atalajazz de Laxe.
Sen dúbida o máis relevante deste verán, e que ata os medios consideraron como “éxito rotundo” foi a creación da Compostela Carpa Cabaré, que nas Festas do Apóstolo de Santiago de Compostela. conmemorou o Centenario da Feira Rexional Galega de 1909.
Un desfile con máis de 100 persoas caracterizadas, o pregón do centenario a cargo de Nelson Quinteiro e a Compañía Femme Fatale, e a instalación da Carpacabaré pola que pasaron un ducia de compañías, e da que a nosa compañía foi anfitriona.
En setembro volveu unha cita co Festival Galego de Cabaré na Coruña, esta vez na súa cuarta edición, a da consolidación, e que durante máis dunha semana encheu as paredes, as rúas, os bares, o Fórum Metropolitano ou o Teatro Rosalía de Castro coa maxia, o glamour e a cor do cabaré. Nestas datas a Compañía Femme Fatale ofreceu varias representacións do espectáculo Cabarédeambulante, unha función do Cabaréncrise ou a Gala Femme fatale, que fechou o certame.
Estivemos na Feira Galega das Artes Escénicas, na área de mercado, contando este ano co stand nº 1, que fixo o noso traballo completamente visible.
Estivemos no Teatro Arte Livre de Vigo, por medio da Rede Galega de Salas, ou na Feira ACHEGARTE, que encheu o baleiro deixado polo Culturgal.
Fechamos o 2009 programando, un ano máis, parte da sección de rúa das Festas de Nadal en Ferrol.
Ademais traeremos dende Burgos á Compañía Cal y Canto Teatro, para facer unha xira por Ferrol, A Coruña ou Ourense co seu espectáculo A-TA-KA.
Connosco traballaron a St James Street Band, a Compañía Fredi, Carla de Figueredo, Moncho do Orzán, Pajarito, Micky Nervio e os Bluesmakers, a Miñor Swing, a internacional orquesta Desvarietés, Assircópatas, A Familia Crowley, Zanguango Teatro dende Burgos, a Compañía Mundo Mandarina, Lorena Gómez, o Mago Cayetano Lledó, Iván Villar, Amparo Novas, Lilí Berlín, os Veraneantes, Cal y Canto Teatro ou moitos autros máis que seguro se me quedan no tinteiro.
Chega o 2010, e con el, unha vez máis un ano de cambios. A crise apretará forte este ano, sobre todo no que implica ós orzamentos dos Concellos, e por iso hai que adaptarse a unha nova situación para poder sobrevivir nos difíciles tempos que aínda están por chegar.
Centrarémonos máis na creación de propostas de rúa. Comezaremos o ano asistindo á cabalgata de reises de Ourense, ou ofrecendo unha función do espectáculo CABARÉNCRISE no Auditorio da mesma cidade. No 2010 verá a luz o V Festival Galego de Cabaré, que esta vez, na súa quinta edición será máis contundente e con novo formato. Seguiremos traballando para ofrecer o mellor de nós e que non decaia esta nova forma de creación escénica que incorpora lago tan necesario para os tempos que corren como é o humor, unido coma sempre ó descaro, á provocación, a ambigüedade, a nocturnidade ou o glamour que caracterizan ó cabaré.
Grazas a todos os que camiñástedes con nós. Ós programadores e axentes culturais que confiastedes en nós unha vez máis, e sobre todo ó público, coma sempre tan agradecido co noso traballo.
Unha aperta grande e sentida, bo nadal, feliz 2010 e que este ano o Apalpador traia para todos e todas un ano cheo de teatro!
Apertas,
Nelson Quinteiro
